مقالات // كل المقالات // فيديو: خطاب القوس في وقفة "صرخة كويريّة للحريّة"

فيديو: خطاب القوس في وقفة "صرخة كويريّة للحريّة"

حنين معيكي تلقي خطاب القوس في وقفة "صرخة كويريّة للحريّة" في حيفا.

شو صار معنا آخر سنة وليش احنا هون اليوم؟

احنا هون عشان قضايا التعددية الجنسية والجندرية ما نزلتش عن النقاشات الاجتماعية والسياسية على مدار أكثر من سنة. نقاشات الي كشفت كثير فجوات، وثنائيات، وعنف شنيع، وبالتوازي كشفت كمان وقوة وشجاعة عند كثير اشخاص مثليات/ين، بايسكشوال ترانس وكويرز واشخاص بعيشوا توجهات جنسية وجندرية مختلفة، وكشفت اصوات اوضح ودعم اكثر ظاهر من قبل عائلاتنا وأصدقاءنا وحلفاءنا.

احنا هون عشان اغلبنا منهكين ومجروحين من مواجهة العنف، بس كمان عشان ملانين طاقة وقوة وغضب نكمل المشوار ونحتج ونرفع صوتنا ضد اي عنف بطول أجسادنا وبحاول يسيطر علينا باسم التقاليد البالية، والمعايير الزائفة الي بتحاول تغربنا عن بلدنا أو بتمحي مين احنا.

جايين نرفض بشكل قاطع تخويفنا وتهديدنا وابتزازنا الجسدي والجنسي والنفسي واحنا عايشين بيناتكم، وذمنا والتحريض علينا حتى بعد ما نموت.

جايين اليوم نصرخ ونحتج ضد استعمال قضايانا واستغلالنا عشان مصالح شعبوية او اقتصادية ضيقة. جايين نحتج على تحجيم قضايا المثليين البايسكشوال والترانس والكويرز ل "هذاك الموضوع" من قبل قيادات مجتمعنا. جايين نقول بشكل واضح انه قضايانا هي قضايا مجتمعية. قضايا بتخصنا جميعا.

جايين نحتج على سكوت الاخصائيين والمهنيين الغير اخلاقي والتنصل من دورهم الطبيعي في محاربة مواقف مساندة للعلاج القسري للمثليين الي اقل ما يمكن وصفه كتعذيب. جايين نطالب المهنيين لإنهاء سكوتهم على قضايا من المفروض تكون في صلب عملهم. ونقول للإعلام خلص تشوفنا كموضوع ساخن لما في أزمات فقط عشان الريتينج، وخلص تغطية صفرا بتساعدش المجتمع يتقدم ويتحوار.

جايين نطلق صرخة لعائلاتنا. ونقولكم أنه بنتفهم التحديات الي عم تمرقوها، ولكن اجى الوقت نطلب منكم تتنازلوا عن دوركم كحارس التقاليد والسمعة وشو رح يقولوا الناس والمجتمع. دعمكم النا وقلقكم على صحتنا النفسية والجسدية، أهم من كلام الناس.

نازلين على حيفا من كثير محلات في فلسطين نصرخ ضد إلغاء فعالياتنا وقمع نشاطاتنا في يافا ورام الله ونابلس. ملاحقاتكم، بس بتزيد إصرارنا نكمل نوسع إمكانيات وفرص الحياة لكويرز ومثليات وترانس في هاي البلد المركبة.

نازلين نحط حد لكل محاولات غسيل الاحتلال الوردي الي على مدار عقدين ما قدرت تمحينا وتجردنا من قوتنا، وبس بتزيد اصرارنا وادراكنا انه تحررنا مربوط في تحرر فلسطين.

للاصدقاء والداعمين والي موجودين هون شكرا على الظهور وعلى الدعم فش تغيير ببدا من دونكم، ولكن تعالوا ما ننجر للنقاشات القطبية، وننتبه نضل نفتح مساحات مشتركة لكل شخص الي بعده بصارع مع اسئلة حول هاي القضايا. تعالوا نغير سوا.

جايين نصرخ وهل مرة صرخة قوية عشان كل هذا الشغل والانجازات والتغيير عم يعملوه كل يوم كويرز وترانس ومثليات واشخاص بعيشوا تجارب جنسية وجندرية مختلفة، ومش بس كنشطاء في حراكاتنا، ولكن كأفراد الي بحاربوا في اجسادهم العنف الي بالشارع والبيت كل يوم.

صرخة لجميع الكويرز واشخاص بعيشوا توجهات جنسية وجندرية مختلفة انه صراعنا جذري وشامل ضد كل الي بقمعونا، وهو نضال من أجل قيم تحررية لعالم اكثر عدالة. خلينا ناخذ مسؤولية على نضالنا، خلي الامنا المستمرة تحركنا، وبالتوازي نركز على آمالنا الي بتخلصش كدافع لتغيير هذا العالم القاسي.

واخيرا حضن كبير لكل الافراد الي ما قدروا يكونوا هون اليوم لأسباب صحية بسبب الجائحة، او عشان محدوديات اجتماعية تتعلق بالظهور والعنف، او بسبب العوائق الاستعمارية الي بتعمل على تقسيمنا وشرذمتنا كل يوم. شكر كبير لكل الناس الي اشتغلت من وراء الكواليس الي من دونها ما صارت هاي الوقفة اصلا. منعرف انكو موجودين وعم تتابعونا، وبنتامل قدرنا نعبر ولو بشوي عن افكاركم ومشاعركم واكيد كلنا رح نلتقي قريبا في فلسطين حرة.


لقراءة النص باللغة الإنجليزية اضغطوا هنا.

photo